Tramp Rusiyanın bu əməkdaşlığını sərt tənqid etdi | Hindistan Ağ Evdən dəstək gözləyir

Hindistanın dörd ən böyük dövlət neft emalı zavodu Rusiya neftinin alışını dayandırıb.

Bu barədə məlumatı “Reuters” sənaye mənbələrinə istinadən yayıb.

Söhbət “Indian Oil Corp”, “Hindustan Petroleum Corp”, “Bharat Petroleum Corp” və “Mangalore Refinery Petrochemical Ltd” şirkətlərindən gedir.

Bu, ABŞ Prezidenti Donald Trampın Rusiya neftini alan ölkələri gömrük rüsumu ilə hədələməsi səbəbindən baş verib. Həm də Tramp “Truth Social”da Hindistanın Rusiya ilə əməkdaşlığını iki dəfə tənqid edib. Bu isə Narendra Modi hökuməti üçün ciddi xəbərdarlıqdır.

Qeyd edək ki, Hindistanda Rusiya neftinin ən böyük alıcıları “Reliance Industries” və “Nayara Energy”dir. Avropa İttifaqı da nəzarət səhm paketi “Rosneft”ə məxsus olan “Nayara Energy”yə qarşı sanksiya tətbiq edib. Yeni Dehli Moskva ilə əməkdaşlığa görə, Vaşinqtonla münasibətlərin pozulmasını istəmir.

Həm Hindistanın, həm də ABŞ-nin Çinlə münasibəti normal deyil. Hər iki ölkə Çinlə iqtisadi mübarizədədir.

Rəsmi Pekin Avropa ilə ticarət əlaqələrini inkişaf etdirdikdən sonra Hindistanın əlindəki tranzit yollarının boykotuna başlayıb. Bu isə Hindistana böyük çətinliklər yaradıb. Hindistan bu məsələdə Ağ Evin dəstəyinə ümid edir.

Digər önəmli fakt Rusiya neftinə əvvəllər tətbiq olunan böyük endirimlərin azalmasıdır. Odur ki, Hindistan neft üçün Yaxın Şərq və Afrikaya boylanmalı olacaq.