Trampın bu planı Qəzza ilə bağlı mübahisələrə son nöqtəni qoyacaq?

ABŞ Prezidenti Donald Tramp Qəzza üçün yeni plan təqdim edib.

Plan sanki bölgənin xəritəsi üzərinə çəkilmiş yeni xətləri xatırladır: bütün israilli girovların azad edilməsi, Qəzzada daimi atəşkəs, İsrail ordusunun mərhələli şəkildə geri çəkilməsi və HƏMAS-sız idarəetmə.

ABŞ-nin təklifinə görə, Qəzzada ərəb və müsəlman ölkələrinin sülhməramlı qüvvələri dayanacaq, dağıdılmış küçələr isə ərəb dövlətlərinin maliyyəsi ilə yenidən qurulacaq.

Ərəb liderləri isə öz “qırmızı xətlərini” çəkir və bu xəritənin üzərinə öz “şərti rənglərini” əlavə edirlər: ilhaq olmayacaq, yeni İsrail qəsəbələr salınmayacaq, Məscidül-Əqsaya toxunulmayacaq və Qəzzaya humanitar axın dərhal artırılacaq.

İndi baxışlar Ağ Evə yönəlib. Sentyabrın 29-da Tramp və Netanyahu bu planı müzakirə edəcəklər. Sual isə budur: Qəzzanın taleyi bu dəfə harada cızılacaq? Xəritədə, masada, yoxsa real həyatda? Axı Trampın Qəzzanı “azadlıq zonası”na çevirmək, hətta bəzilərinin dediyi kimi, “istirahət zonasına” çevirmək arzuları da hələ gündəmdən düşməyib.

Qəzza həqiqətən azad olacaq, yoxsa sadəcə adının yanına başqa bir “zona” sözü əlavə ediləcək?