Türkiyə futbolunda davam edən mərc qalmaqalı | Mindən çox futbolçunun adı rəsmən açıqlandı

Türkiyə Futbol Federasiyası davam edən araşdırma çərçivəsində mərc oyunlarında iştirakına görə 1024 futbolçunun adını rəsmi olaraq açıqlayıb.

Federasiya Futbol İntizam Direktivinin 57-ci maddəsinə uyğun olaraq, noyabrın 10-dan etibarən qüvvədə olan ehtiyat tədbiri olaraq, bu oyunçuların adlarını Türkiyə Peşəkar Futbol İntizam Şurasına göndərmək qərarına gəlib.

Qalmaqalda adları hallananlar arasında “Beşiktaş” və “Qalatasaray”ın futbolçuları da yer alırlar.

Məlumata görə, Super Liqa və 1-ci Liqa yarışları planlaşdırıldığı kimi davam edəcək. Yalnız bir mərc fəaliyyəti ilə məşğul olduğu müəyyən edilən 47 oyunçunun intizam tədbirləri müvafiq qurumların cavabları və daha çox zərərin qarşısını almaq üçün yeni dəlillər əsasında qiymətləndiriləcək.

Türkiyə Futbol Federasiyası rəsmi qurumlarla yazışmağa davam edir və cavablarına əsasən araşdırmanı genişləndirəcək.

Məlumata görə, adları İntizam Şurasına göndərilən futbolçulardan 27-si hazırda Super Liqada çıxış edən komandaların üzvləridir.