Türkiyə silkələndi | 10-a yaxın bina çökdü, dağıntılar altında qalanlar var

Türkiyənin Balıkesir vilayətində 6,1 maqnitudalı zəlzələ baş verib.

Təbiət hadisəsi Sındırğı rayonunda qeydə alınıb. Zəlzələnin ocağı 11 kilometr dərinlikdə yerləşib.

Sındırğı bələdiyyəsinin sədri Serkan Sakın sözlərinə görə, rayonda 10 bina dağılıb. Həmçinin iki nəfərin dağıntıların altında qaldığı bildirilir.

Hadisə ilə əlaqədar olaraq bütün müvafiq qurumlar hərəkətə keçib. Bu barədə Türkiyə Prezidenti Rəcəb Tayyib Ərdoğan “X”dəki hesabında yazıb.

“Balıkesirdə baş verən zəlzələdə zərər çəkən bütün vətəndaşlarımıza keçmiş olsun. İlk andan etibarən bütün qurumlarımız hərəkətə keçib. Biz də işləri yaxından izləyirik. Allah ölkəmizi hər cür fəlakətdən qorusun”, – deyə Ərdoğan paylaşımında qeyd edib.

Yerli mətbuatın məlumatına görə, Türkiyədə zəlzələlərdən sonra 7 afterşok qeydə alınıb. Təbiət hadisəsi Manisa, İzmir, Uşak və Bursa vilayətlərində hiss olunub. Hazırda axtarış-xilasetmə tədbirləri davam edir.