Türkiyədə antiterror əməliyyatı başladı: saxlanılan terrorçular var

Türkiyədə səhər saatlarından etibarən ölkə boyu genişmiqyaslı antiterror əməliyyatlarına başlanılıb.

Bu barədə ölkənin daxili işlər naziri Ali Yerlikaya özünün “X” platformasındakı hesabında məlumat verib.

Bildirilib ki, ölkə ərazisini əhatə edən antiterror əməliyyatına 13 440 təhlükəsizlik qüvvələri əməkdaşı cəlb edilib və ümumilikdə 466 əməliyyat həyata keçirilib. Ümumilikdə 6 vilayətdə gerçəkləşdirilən əməliyyatlar zamanı terrorçuluqda şübhəli bilinən çox sayda şəxs saxlanılıb.

“Bütün Türkiyə ərazisində separatçı terror təşkilatına qarşı başladılan “Qəhrəmanlar” əməliyyatları çərçivəsində Mersin, Van, Şanlıurfa, Mardin və Aydın vilayətlərində terror təşkilatına üzv olmaqda şübhəli bilinən 12 nəfər ələ keçirilib. 16 vilayətdə həyata keçirilən əməliyyatlar zamanı 55 terror təşkilatı üzvü saxlanılıb.

Əziz xalqımızın bilməsini istəyirəm ki, biz heç bir terrorçuya gözünü açmağa da imkan verməyəcəyik. Təhlükəsizlik qüvvələrimizin üstün səyləri ilə terrorla mübarizəmizi fasiləsiz olaraq davam etdirəcəyik”, – deyə türkiyəli nazir vurğulayıb.