Türkiyədə faciəvi hotel yanğınının səbəbi | Dəhşətə gətirən məqamlar

Türkiyənin Kartalkaya dağ-xizək kurortunda yerləşən “Grand Kartal” hotelində baş verən güclü yanğına səbəb aşpazların laqeydliyi olub.

Bu barədə “Sabah” qəzeti araşdırma məlumatlarına istinadən bildirib.

Bildirilir ki, yanğın yanvarın 21-də yerli vaxtla saat 03:21-də aşpazların qonaqlar üçün səhər yeməyi hazırladığı mətbəxdə başlayıb. Onlar alovlanan yağın üzərinə su tökməyə başlayıblar, bu da yanan kütlənin bütün otağa sıçramasına səbəb olub. Çaxnaşma içində aşpazlar küçəyə qaçıb, alov tez bir zamanda hotelin bütün mərtəbələrinə yayılıb, hoteldə yanğın siqnalı söndürülüb.

Son məlumata görə, yanğınla bağlı aparılan istintaq çərçivəsində 19 nəfər həbs edilib. Onların arasında hotelin sahibi, meneceri, kurortun yaxınlığında yerləşən Bolu şəhərinin meriyasının nümayəndələri, Bolu bələdiyyəsi sədrinin müavini də var.

Qeyd edək ki, “Grand Kartal” hotelində baş verən yanğın nəticəsində çoxu uşaq olmaqla 78 nəfər ölüb, 50-dən çox insan isə yaralanıb. Yanğın zamanı hoteldə ümumilikdə 238 qonaq olub.