Türkiyədə İsrail casusu olmaqda şübhəli bilinənlər saxlanıldı

Türkiyənin Milli Kəşfiyyat İdarəsi və İstanbul polisinin Terrorla Mübarizə Şöbəsi keçirdikləri birgə əməliyyat zamanı İsrailin kəşfiyyat orqanına işləyən 7 casusu yaxalayıb.

Saxlanılan şəxslərdən birinin televiziya kanalında səhər proqramlarına qatılan və özəl detektiv işləyən Həmzə Turhan Ayberk olduğu müəyyən edilib.

Həmzə Turhan Ayberk pul qarşılığında MOSSAD-a məlumat sızdırıb və aldığı təlimat əsasında Türkiyədəki Yaxın Şərqdən olan iş adamları və şirkətlər barəsində şəxsi məlumatlar toplayıb.

MOSSAD-ın "Viktoriya" kod adlı agenti özəl detektiv Həmzə Turhan Ayberklə əlaqə saxlayıb. H.T.Ayberk ilk dəfə İsrail Məxfi Xidməti tərəfindən sadə tapşırıqlar üçün istifadə edilib. O, 2019-cu ildə MOSSAD tərəfindən Belqradda görüləcək işlərlə bağlı təlim keçib.

H.T.Ayberk MOSSAD-ın rəhbərliyi altında gizli ünsiyyət proqramlarından istifadə edib. Rəsmi qeydlərdə əks olunmaması üçün o, kriptovalyuta vasitəsilə ödənişlər alıb.