Türkiyədə növbəti dəfə güclü zəlzələ olacaq? | Sakinlər qorxu içində

İstanbulda ardıcıl iki zəlzələ olub. Birinci zəlzələ 3.9, ikincisi isə 6.2 maqnitudada baş verib.

Yeraltı təkanlardan ikincisi daha güclü hiss edilib.

Türkiyə KİV-in məlumatına görə, İstanbuldakı zəlzələ yerin 6.9 kilometr dərinliyində qeydə alınıb, afterşoklar davam edib.

Bildirilib ki, Mərmərə dənizinin Silivri rayonu sahillərində 10 saniyə davam edən yeraltı təkan təşvişə səbəb olub və ətraf vilayətlərdə də hiss edilib.

Türkiyə Daxili İşlər Nazirliyi yanında Təbii Fəlakət və Fövqəladə Halların İdarə Edilməsi Agentliyi (AFAD) zəlzələ ilə bağlı əhaliyə xəbərdarlıq edib. Daxili işlər naziri Əli Yerlikaya bildirib ki, hər hansısa binanın çökməsi ilə bağlı heç bir məlumat daxil olmayıb.

Yeraltı təkan barədə açıqlama verən Professor Süleyman Pampal birinci zəlzələnin orta, ikinci zəlzələnin isə böyükmiqyaslı olduğunu vurğulayıb.

“Sözsüz ki, bütün bu silkələnmələr gələcəkdə daha böyük zəlzələnin xəbərçisidir. 7 bal və daha güclü zəlzələ gözlənilir. Biz bunu indi qəbul edib bütün planlarımızı buna uyğun qurmalıyıq. Bu bölgədə hərəkətlənmələr hər 250 ildən bir baş verir. Artıq 250 il dolub”, ‒ deyə professor əlavə edib.