Türkiyənin gücünü görməzdən gələ bilmərik, çünki... | NATO admiralından sensasiyalı açıqlama

“Türkiyə Ordusu müharibəyə hazırdır”.

Bunu NATO Hərbi Komitəsinin rəisi admiral Cüzeppe Kavo Draqon deyib.

Admiral Türkiyə Silahlı Qüvvələrinin müharibəyə hazır vəziyyətdə olduğunu bildirib.

“Türkiyə güclü dayaq, güclü istinad və etibarlı müttəfiqdir. Türkiyə alyans üçün çox şey edir. O, alyansın ikinci ən böyük ordusudur, bunu gözardı edə bilmərik. Bu, çox şey deməkdir. Şübhəsiz ki, Türkiyə Silahlı Qüvvələrinin döyüş hazırlığı və effektivliyi ən yüksək səviyyədədir”, ‒ Draqon vurğulayıb.

NATO admiralı Türkiyənin Rusiya və Ukrayna arasındakı vasitəçilik səylərini də yüksək qiymətləndirib:

“Düzünü desəm, hazırda Rusiya-Ukrayna danışıqları ilə bağlı yaxşı vəziyyətdə deyilik. Ancaq məsələ burasındadır ki, Türkiyənin strateji mövqeyinə görə ön planda olduğuna inanırıq. Çünki müharibənin kənarında olan ölkələrdən biridir. Düşünürük ki, Türkiyə səylərini davam etdirəcək və bundan yaxşı nəticələr çıxacaq. Türkiyə sülh prosesində əsas aktorlardan biri olacaq”.