Üç ildir davam edən COVID-19 pandemiyası bitdi

Ümumdünya Səhiyyə Təşkilatı koronavirus üçün pandemiya statusuna yenidən baxıb.

Bununla bağlı təşkilatın Beynəlxalq Fövqəladə Səhiyyə Tənzimləmələri Komitəsinin 15-ci iclasında müzakirələr aparılıb.

Qeyd olunub ki, təşkilatın Baş katibi Tedros Adhanom Qebreyesus COVID-19-un beynəlxalq narahatlıq doğuran fövqəladə vəziyyət statusunun ləğv edilməsinə dair komitənin irəli sürdüyü təkliflə razılaşıb.

“Bir ildən çoxdur ki, pandemiya azalma trendi göstərib. Bu trend bir çox ölkələrə COVID-19-dan öncəki həyata qayıtmaq imkanı verib. Fövqəladə vəziyyət komitəsi 15-ci dəfə görüşüb və tövsiyə olunub ki, beynəlxalq narahatlıq doğuran ictimai səhiyyə fövqəladə vəziyyətinin bitdiyini elan edim. Mən bu tövsiyəni qəbul etmişəm”, – deyə Baş katib mətbuat konfransında deyib.

A.Qebreyesus həmçinin əlavə edib ki, bu, koronavirusun artıq qlobal təhlükə olmadığı anlamına gəlməməlidir, virus hələ də qalır, buna görə də bütün dövlətlər digər yoluxucu xəstəliklər kimi, bu xəstəliklə də mübarizə yollarını öyrənməlidir.

Qeyd edək ki, COVID-19 pandemiyası başlayandan dünyada 20 milyondan çox insan virusa yoluxaraq dünyasını dəyişib.