Ukrayna DİN-dən nazirin ölümü ilə bağlı açıqlama

"Ukrayna hakimiyyəti Kiyev vilayətinin Brovarı şəhərində helikopterin qəzaya uğramasının mümkün səbəbləri kimi təxribat və uçuş təhlükəsizliyi qaydalarının pozulmasını nəzərdən keçirir".

Bu barədə Ukraynanın daxili işlər nazirinin müşaviri Anton Geraşenko öz "Telegram" kanalında yazıb.

"Faciənin səbəbləri müstəntiqlər tərəfindən müəyyən edilir. Bunun təxribat, avadanlığın nasazlığı, uçuş təhlükəsizliyi qaydalarının pozulması olub-olmadığını tezliklə öyrənəcəyik”, - deyə Geraşenko bildirib.

Ukrayna Prezident Aparatının rəhbərinin müavini Kiril Timoşenko isə bildirib ki, helikopter qəzasında həlak olan Daxili İşlər Nazirliyinin rəhbərliyi döyüş əməliyyatlarının getdiyi qaynar nöqtələrdən birinə uçurdu.

Qeyd edək ki, Brovarıda yanvarın 18-i səhər saatlarında baş verən qəza nəticəsində azı 19 nəfər ölüb, onlarla yaralı var.