Ukrayna ən böyük məqsədlərindən birinə çatacaq? - Orbandan diqqətçəkən mesaj

“Ukrayna hələ münaqişədən əvvəl müflis olmuşdu. 1990-cı illərdə ukraynalılar iqtisadiyyatı normal fəaliyyət göstərən dövlət qura bilmədilər”.

Bunu yerli telekanala müsahibəsində Macarıstanın Baş naziri Viktor Orban deyib.

O qeyd edib ki, Ukrayna NATO və Avropa İttifaqına üzv olmaq iqtidarında deyil, çünki bu ölkənin iqtisadi vəziyyəti qeyri-qənaətbəxşdir.

Viktor Orbanın fikrincə, Ukraynanın Avropa İttifaqına daxil olması cəmiyyət üçün böyük problemlərlə nəticələnəcək.

Baş nazir qeyd edib ki, Ukraynanın NATO-ya daxil olması qəbuledilməzdir. “Əgər o, NATO-ya daxil olarsa, Şimali Atlantika Alyansı ilə Rusiya arasında müharibə olacaq. İndi bu birləşmə mümkün deyil, geosiyasi reallıq belədir. Rusiya ilə birbaşa münaqişə bizim maraqlarımıza cavab vermir”, – deyə V.Orban vurğulayıb.

Baş nazir Aİ-nin Rusiya əleyhinə tətbiq etdiyi sanksiyalara da toxunub. “Sanksiyalar səbəbindən son üç ildə 20 milyard avro itirmişik. Bu, Macarıstan üçün çox ciddi məbləğdir”, – deyə o əlavə edib.