Ukrayna parlamentindən yeni təklif

Ukraynada ictimai yerlərdə Rusiya musiqisindən istifadəyə görə cərimələrin tətbiqi təklif edilir.

Bununla bağlı Ali Radada müvafiq qanun layihəsi ilə bağlı təklif irəli sürülüb. Bildirilir ki, bununla təkcə Rusiya mədəniyyəti məhsulu qadağan edilmir, eyni zamanda bu sahədə milli sərvətlərin dəstəyinə də geniş şərait yaradılır.

Ukrayna Ali Radasının Korrupsiyaya qarşı Mübarizə Siyasəti üzrə Ali Rada Komitəsi sədrinin birinci müavini, deputat Yaroslav Yurçişin yeni təklifin nədən ibarət olacağına dair Baku TV-nin Şərq Avropa bürosuna açıqlama verib.

Rusiya mövcud olduğu bütün dövrlərdə, o cümlədən Rusiya imperiyası və Sovet İttifaqı dönəmlərində işğal altındakı ərazilərdə rus mədəniyyətinin hakim mövqeyə malik olması üçün daim ciddi səylər göstərildiyini vurğulayan millət vəkili qeyd edib:

“Bu, indi də davam edir. İndi biz bundan azad oluruq. Qanun layihəsinin məqsədi budur. Əgər kimsə işğalçı dövlətin Qriqori Leps, Filip Kirkorov və ya digər müğənnilərinə qulaq asmaq istəyirsə, cərimə ödəməlidir. Yalnız bu yolla rus dünyasından yaxamızı qurtara bilərik”.

Qeyd edək ki, müvafiq qanun layihəsinin Ali Radanın növbəti iclaslarının birində müzakirəyə çıxarılacağı gözlənilir.