Ukrayna Rusiya təyyarələrini sovet qurğuları ilə vurur | Sensasiyalı açıqlama

Son vaxtlar Ukraynadakı müharibənin gedişində Rusiyanın hərbi təyyarələrinin ardıcıl məhv edilməsi dünyanın diqqətini çəkib.

Xüsusilə bu günlərdə Rusiyaya məxsus “A50” tipli təyyarənin vurulması müzakirələrə səbəb olub. Çünki bu cür strateji təyyarələr Rusiyanın özündə belə məhdud saydadır və dünyanın tək-tük ölkələri bu təyyarələrə sahibdir.

Silah cəhətdən korluq çəkən Ukrayna Ordusunun belə bir uğuru müxtəlif suallar yaradıb. Çünki Qərb indiyədək Kiyevə silah dəstəyini məhdud şərtlər əsasında göstərib ki, bu da Ukraynanın bu kimi hücumu həyata keçirməsinə kifayət etmir. Yəni Qərbin verdiyi silahlar yalnız Ukrayna ərazisində istifadə üçündür.

Ukrayna Müdafiə Nazirliyinin Baş Kəşfiyyat İdarəsinin rəsmisi Andriy Yusov bildirib ki, düşmən təyyarələrinin vurulması üçün Ukrayna bütün mövcud imkan və mexanizmlərdən istifadə edir:

“Ukrayna ərazisində hər bir avadanlıq kombinasiyalı şəkildə çalışır. Bu, tərəfdaşlarımızın köməyi zamanı da baş verir. Ukraynanın hüdudlarından kənarda düşmən ərazisində və ya səmasında vurulanlar əvvəldən əlimizdə qalan Ukrayna və ya sovet silahlarının qalıqlarıdır”.

Qeyd edək ki, son 2 həftədə Ukrayna qarşı tərəfə məxsus 6 müxtəlif tipli hərbi təyyarəni vurub ki, bunların da çoxu Rusiya ərazisində baş verib.