Ukrayna Rusiyanı bombalamağa hazırlaşır? | Parada hansı ölkənin hərbçiləri qatılacaq?

İkinci Dünya müharibəsində Qələbənin 80-ci ildönümü ilə əlaqədar Moskva 9 may tarixində paradın keçirilməsinə xüsusi hazırlaşır.

Qırmızı Meydanda hər il keçirilən bayram konserti ləğv edilsə də, Kreml hakimiyyəti parada hazırlıqlar görür. Artıq paradın məşqlərinə başlanılıb və tədbirdə 19 dost dövlətin hərbçilərinin iştirakı gözlənilir. Onların arasında əvvəllər SSRİ-nin tərkibində olan yeddi ölkə var.

Paradda iştirakını təsdiqləyən ölkə liderlərinin sırasında Çin, Braziliya, Kuba, Venesuela, Serbiya, Slovakiya, Fələstin, İsrail, Malayziya, İndoneziya yer alır. Həmçinin parada Şimali Koreyadan olan hərbi qulluqçular da qatılacaqlar.

Moskvada təhlükəsizlik tədbirləri görülür. Bununla həm daxili, həm də xarici təhdidlərin qarşısını almaq nəzərdə tutulur.

Bu məqamda əsas təhlükə Ukraynanın PUA hücumudur. Elə bu səbəbdən Rusiya Prezidenti Vladimir Putin Qələbə Günü ilə bağlı üçgünlük atəşkəs elan etmişdi. Lakin Ukrayna tərəfi bunu Pasxa bayramında olduğu kimi səmimi saymayıb. Hətta Ukrayna lideri Volodimir Zelenski Kremlin 9 may tarixində hücumlardan sığortalanmadığına eyham da vurub.

Rusiya Prezidenti Vladimir Putin Təhlükəsizlik Şurası ilə iclas keçirib. İctimai təhlükəsizliyin təmin edilməsi üçün əlavə tədbirlərin görülməsi müzakirə edilib.

Kremlin sözçüsü Dmitri Peskov paradda xarici qonaqların və dövlət başçılarının iştirakının nəzərdə tutulduğunu bildirərək təhlükəsizlik tədbirlərinin qanunvericiliyə uyğun şəkildə həyata keçiriləcəyini vurğulayıb.