Ukrayna taxılını Qara dəniz vasitəsilə dünya bazarına çıxardı

Ukrayna Rusiyanın sazişdən imtina etməsinə baxmayaraq, taxılını Qara dəniz vasitəsilə dünya bazarına çıxışını yenidən bərpa edib.

Prezident Ofisinin müşaviri Mixaylo Podolyak bildirib ki, bu, Ukraynanın Rusiyanın Qara dənizdə olan hərbi hədəflərini məhv etdikdən sonra mümkün olub.

“Ukraynanın cənub sahilindən “Taxıl dəhlizi” işini bərpa edib. Rusiya ilə heç bir razılaşma olmadan son 4 ayda artıq 8 milyon tondan çox yük daşınıb. Bununla Krımın alınmaz qala olması barədə hekayənin də doğru olmadığı ortaya çıxdı. Biz il boyu Krımda bütün hərbi və tranzit dəhlizlərə, logistika mərkəzlərinə və hərbi bazalara təsirli zərbələr endirdik. Bu, Rusiya ilə müharibədə Ukraynanın strateji uğurudur.

Bu həm də onu göstərir ki, Rusiya çoxlarının düşündüyü qədər güclü deyil. Dəhliz artıq 4 aydan çoxdur ki, səmərəli fəaliyyət göstərir. Bu, xarici bazarda məhsul satmaqda bizə fəal kömək edir. Dəhlizin mühafizəsi sualtı və yerüstü dronlardan təşkil olunub. Bu isə öz növbəsində bizə böyük bir donanmandan müdafiə olunmaq, çox sayda gəmini məhv etmək imkanı verir”, – deyə o əlavə edib.

Qeyd edək ki, bu ilin yazında Rusiyanın imtinası ilə dayanan “Taxıl dəhlizi” sazişinin əsası ötən ilin noyabrında İstanbulda Türkiyənin ev sahibliyi, BMT, Rusiya və Ukraynanın iştirakı ilə qoyulub.