Ukraynada dəhşət dolu anlar | Putin Trampı nəyə inandırmağa çalışır?

Avqustun 19-u gecə saatlarında Ukraynanın bir neçə şəhəri Rusiya Silahlı Qüvvələri tərəfindən kütləvi dron hücumuna məruz qalıb. Ölkənin mərkəzində yerləşən Poltava vilayətinə endirilən zərbələr nəticəsində Kremençuq və Lubensk rayonlarında genişmiqyaslı yanğınlar baş verib.

Bu barədə Poltava Regional Dövlət Administrasiyasının rəhbəri Vladimir Koqut məlumat verib.

Bildirilib ki, enerji sektoru müəssisələrinin inzibati binalarına ziyan dəyib, 1500-dən çox sakin işıqsız qalıb.

Kremençuq şəhər meri Vitali Maletski qeyd edib ki, hücumdan sonra şəhərdə bir neçə partlayış və yanğın baş verib. Əsas hədəf enerji və nəqliyyat infrastrukturu olub.

“Putin telefon danışı zamanı Trampı inandırmağa çalışır ki, regionda sülhün bərqərar olmasını istəyir. Volodimir Zelenski isə Ağ Evdə Avropa liderləri ilə danışıqlar aparır. Bunların fonunda isə Putinin Ordusu Kremençuqa növbəti dəfə kütləvi zərbə endirir”, ‒ deyə mer “Telegram” səhifəsində paylaşımında vurğulayıb.

Qeyd edək ki, gecə ərzində Xarkov və Dnepropetrovsk vilayətləri də PUA ilə atəşə tutulub, mülki obyektlərə ziyan dəyib, yaralananlar var.

Avqustun 18-i axşam saatlarında Donetsk vilayətinə hücum nəticəsində isə 4 nəfər həlak olub, 7 nəfər yaralanıb.

Ukrayna Silahlı Qüvvələrinin Baş Qərargahından əlavə edilib ki, son sutka ərzində cəbhədə 186 döyüş toqquşması qeydə alınıb, Rusiya Ordusunun daha 890 hərbçisi və 66 hərbi texnikası məhv edilib.