Ukraynada prezident seçkiləri nə vaxt keçiriləcək? - Politoloqdan açıqlama

Mayın 21-də Ukrayna Prezidenti Volodimir Zelenskinin 5 illik qanuni səlahiyyət müddəti başa çatır.

Hazırda müharibə fonunda Ukrayna və region ictimai sektorunda bu məsələ ciddi müzakirə olunur.

V.Zelenskinin prezidentlik müddəti başa çatsa da, artıq 2 ildən çoxdur ölkədə gedən genişmiqyaslı müharibə səbəbindən Ukrayna Konstitusiyanın tələbinə görə seçkilərin keçirilməsini məqbul saymır.

Məhz buna görə də bu ilin martında gözlənilən prezident seçkiləri təxirə salınıb. Lakin Konstitusiya Məhkəməsinin məsələ ilə bağlı icitimaiyyətə məlumat verməməsi qeyd olunan müzakirələri daha da qızışdırıb.

Ali Radanın deputatı Lüdmila Buymister bildirib ki, Ukraynada seçkilərin keçirilməsi heç praktik olaraq da mümkün deyil:

“Ukraynalıların çoxu indi döyüşür və necə ola bilər ki, ordu səngərdə oturub hansısa seçkilərə səs versin? Bu sual bu gün cavabsız qalır. Əlbəttə, Rusiya təbliğat maşını bizə qarşı bütün psixoloji rıçaqlardan istifadə edəcək.

Amma gəlin açıq danışaq, bu gün hazırkı şərtlərdə Ukrayna Prezidentinin reytinqi kifayət qədər yüksəkdir. Bizim hazırda xarici düşmənimiz birdir və o, bəllidir, hansı ki, biz onunla vuruşuruq. Amma daxili düşmənlərimiz də kifayət qədərdir. Bizə daxili siyasi parçalanma, siyasi müharibə lazım deyil. Biz demokratiyaya doğru qayıdacağıq”.