Ukraynada yeni qanun layihəsi niyə narazılığı səbəb oldu?

Ukrayna Ali Radasının antikorrupsiya siyasəti ilə bağlı qəbul etdiyi qərar ölkə üzrə narazılığa səbəb olub.

Qanun layihəsinə görə, indiyədək müstəqil olan Antikorrupsiya Bürosu və İxtisaslaşdırılmış Antikorrupsiya Prokurorluğu ləğv edilərək, onların səlahiyyətləri Baş Prokurorluğa verilir. Dolayısı ilə bu iki qurumun səlahiyyətləri prezidentin nəzarətinə keçir. Bu da müxalif və bitərəf deputatların etirazına səbəb olub.

Hətta hakim “Xalqın Xidmətçisi” partiyasından olan deputat Yuliya Yatsik Baku TV-nin Şərqi Avropa bürosuna bildirib ki, qanun layihəsinin digər bəndləri yaxşı olsa da, Baş prokurorun səlahiyyətləri ilə bağlı hədd aşılıb.

“Ali Radanın iclasından öncə komitə təcili şəkildə hansısa gizli kuluarlarda iclas keçirib və bu qanun layihəsinə, onun mövzusuna tamamilə aid olmayan düzəlişlər edilib. Xüsusilə bu düzəlişlər Baş Prokurorun səlahiyyətlərini genişləndirir və ona Milli Antikorrupsiya Bürosunda olan və prosessual rəhbərliyi İxtisaslaşdırılmış Antikorrupsiya Prokurorluğu tərəfindən həyata keçirilən cinayət işlərinə təsir etmək hüququ verir. Bu, prokurorların əvəz edilməsi, istintaq orqanının dəyişdirilməsi, cinayət işlərinin bağlanması kimi səlahiyyətlərdir”, – deyə o əlavə edib.