Ukraynadakı müharibədə həlak olan jurnalistlərin sayı açıqlandı

Artıq il yarımdan çoxdur Rusiyanın Ukraynada apardığı genişmiqyaslı müharibənin ən həssas məqamlarından biri də xarici jurnalistlərin bu ölkədəki fəaliyyətidir.

Baku TV-nin əməkdaşı da daxil olmaqla müharibənin ilk günündən Ukraynada dünyanın müxtəlif media orqanlarının 10 minə yaxın nümayəndəsinin fəaliyyət göstərdiyi bildirilir. Son vaxtlar isə Ukraynada onlara qarşı bəzi məhdudiyyətlərin qoyulmasının şahidi oluruq.

Ukrayna Milli Jurnalistlər İttifaqının rəhbəri Sergiy Tomilenko xarici jurnalistlərin cəbhə bölgəsinə səfəri ilə bağlı qoyulan məhdudiyyətlərdən danışıb: “Ukrayna Silahlı Qüvvələrinin Baş Qərargahına sorğu göndərdik. 3 gün ərzində problem öz həllini tapıb. Bildirilib ki, mətbuat işçilərinin standart işi bərpa olunub. Düşünürəm ki, bu kimi məhdudiyyətlər Rusiyanın kəşfiyyat məlumatları əldə etmək imkanları ilə bağlıdır. Biz istəyirik ki, jurnalistlər təhdid kimi yox, öz auditoriyasına həqiqəti çatdırmaq istəyən peşəkarlar kimi qələmə verilsinlər. Kiyevdə xarici jurnalistlərin fəaliyyətinə mane olan bəzi məmurları da öz məsuliyyətlərini dərk etməyə çağırırıq. Əgər biz bu nöqsanları tənqid etməsək, düşmənə qarşı mübarizə aparan ölkəni qura bilməyəcəyik”.

Sergiy Tomilenko həmçinin müharibə müddətində Ukraynada həlak olan jurnalistlərin, o cümlədən ölkədə bağlanan media orqanlarının sayını açıqlayıb: “Ukraynada fəaliyyət göstərən KİV redaksiyalarının təxminən üçdə biri müharibə səbəbindən bağlanıb. Yüzlərlə jurnalist işindən ayrılaraq ordu sıralarına qoşulub. Müharibə səbəbindən həyatını itirən KİV nümayəndələrindən də danışmaq istəyərdim. Təəssüf ki, aralarında xarici jurnalistlərin də olduğu 70-dən çox media işçisi Rusiyanın ölkəmizdə apardığı müharibənin qurbanı olub. Söhbət Litvadan, ABŞ-dən, Fransadan və Böyük Britaniyadan olan media nümayəndələrindən gedir. Həmçinin Krımda öz peşə borcunu yerinə yetirən 15 jurnalist həlak olub. Mariupolda həyatını itirənlər arasında Ukrayna Silahlı Qüvvələrinin sıralarına qoşulan jurnalistlər də olub. Onların ailələrinə başsağlığı veririk”.

Qeyd edək ki, son günlərdə Ukraynada vəziyyət gərginləşib. Paytaxt Kiyevlə yanaşı, ölkənin bir sıra vilayətləri Rusiya Ordusu tərəfindən mütəmadi olaraq raket və PUA hücumuna məruz qalır.