Ukraynanın taleyi ABŞ-dən asılı qaldı - Kiyevdə qızğın müzakirə

Ukrayna Prezidenti Volodimir Zelenskinin yerli mətbuata müsahibəsində “ölkəmizin taleyi ABŞ-də prezident seçkisinin girovuna çevrilib” deməsi regionda ciddi müzakirələrə səbəb olub.

Bu, genişmiqyaslı müharibənin getdiyi Ukraynada ABŞ-yə qarşı ikrah hissini artırıb. Yerli və Avropa mediası hazırda bu mövzuda müzakirələrlə doludur.

Hərbi ekspert Dmitro Qromakov Baku TV-yə açıqlamasında bildirib ki, təkcə Ukrayna deyil, bütün xarici siyasət ABŞ-də keçirilən prezident seçkilərindən asılı vəziyyətə düşüb:

“Bu vəziyyət həm ABŞ-nin özü, həm də bütövlükdə Avropa üçün bir sıra ciddi risklər daşıyır. Biz artıq Almaniyanın öz döyüş potensialını artırmaq istəyini və Fransanın Avropada əsas, dəstəkləyici hissə kimi çıxış etmək səylərini, hətta nüvə çətirinin ABŞ-dən Böyük Britaniyaya doğru dəyişməsini müşahidə edirik.

Yəni əslində, Rusiyanın nüvə təhdidinə əsas cavab da Böyük Britaniyadan verildi. Buna görə də bu vəziyyətdə ABŞ-nin qeyri-müəyyənlik dövrü nə qədər uzun çəkərsə, ABŞ Avropada daha çox təsirini itirəcək.

Bu, ona gətirib çıxarır ki, bu və ya digər şəkildə amerikalılar ilk növbədə Avropada öz siyasi təsirlərini itirəcəklər. Avropa rəsmilərinin və hərbi ittifaq ölkələrinin, Avropa müttəfiqi ölkələrinin ritorikasına baxsaq, bu tendensiyalar artıq nəzərə çarpır”.

Qeyd edək ki, hazırda Rusiya və Ukrayna arasında Xarkov, Donetsk, Xerson, Zaporojye vilayətləri uğrunda gedən döyüşlərin kəskinləşməsi fonunda ölkələr digər arxa şəhərlərə də hava hücumlarını artırıb. Eyni zamanda 1 illik fasilədən sonra cəbhə xəttində mövqe dəyişiklikləri var.