Ukraynaya sərt xəbərdarlıq | Rusiya yenə “Hörümçək toru”na düşməkdən qorxur?

“Ukraynanın iyunun 1-də Rusiyanın aerodromlarına hücumu dalana dirənmiş savaşın yeni fazaya keçməsi barədə siqnaldır”.

Bu sözlər “The Wall Street Journal”da yayılan yazıda qeyd olunub.

Məqalədə tərəflərin daha çox eskalasiyaya kökləndiyi vurğulanıb. Çünki ABŞ-nin vasitəçiliyi ilə təklif olunan sülh sazişi əlçatmaz görünür:

“40 aylıq müharibə səngimək əvəzinə daha da qızışır. Səbəb Donald Trampın minimal müqavimətidir”.

Belə olan halda Ağ Evin “danışıqlar prosesindən geri çəkiləcəyik” hədələri aktuallaşır. Bəzi analitiklərin fikrincə, D.Trampın savaşdan imtina vədi də real görünmür.

“Çünki bu imtina hərbi toqquşmaları uzadacaq. Həm də bu, uğursuzluğu və məğlubiyyəti etiraf etməkdir”, – deyə ABŞ-nin Ukraynadakı sabiq səfiri Uilyam Teylor bildirib.

Rusiya Prezidenti Vladimir Putin düşünür ki, Donald Tramp Ukraynanın tərəfini tutmayacaq və Rusiyanı sanksiyalarla sıxmayacaq. Heç Kiyevə ABŞ-dən genişmiqyaslı silah təchizatı da gözlənilmir.

Məqalədə o da qeyd olunub ki, bu mövzuda Ağ Evin başqa strategiyası da mövcuddur. Yəni Kreml istəmədiyi sürprizlərlə qarşılaşa bilər.

“The Wall Street Journal” bir məsələni də qeyd edib ki, Ukrayna “Hörümçək toru” kimi əməliyyatları təkrarlasa, Rusiya İstanbul danışıqlarından imtina edəcək.