Ultrabənövşəyi şüaların ən güclü vaxtı açıqlanıb

Qış aylarından sonra dərinin həssaslığı artır. Bu səbəbdən yaz fəslində havanın sərin olmasına baxmayaraq, günəş şüaları asanlıqla dəri yanıqlarına səbəb ola bilər.

Bu barədə rusiyalı dermatoloq danışıb.

"Əksəriyyət yaz günəşinin zərərini ciddiyə almır, çünki sərin hava aldadıcı ola bilər. Ancaq ilin bu dövründə ultrabənövşəyi şüalar çox aktivləşir və qışdan çıxmış dəri daha zəif olur. Baharda atmosferin qoruyucu qatı nazikləşdiyi üçün ultrabənövşəyi şüalar Yer səthinə daha güclü təsir edir. Həmçinin havanın temperaturunun yüksək olmaması yaydakı kimi istilik hissi yaratmır. Nəticədə sərin havada belə fərqinə varmadan günəşdə yanmaq ehtimalı yüksəkdir.

Qış aylarında melanin istehsalının azalması və dərinin təbii qoruyucu xüsusiyyətlərini itirərək ağarması riskləri daha da artırır. Bunun nəticəsində immunitetin zəifləməsi və şüaların birbaşa təsiri ilə yaranan bədxassəli dəri xəstəlikləri, kollagenin parçalanması nəticəsində erkən qırışlar, elastikliyin itməsi, yaş ləkələrinin əmələ gəlməsi ilə müşayiət olunan fotoqocalma, həmçinin günəş yanıqları və allergik hallar baş verə bilər", – deyə mütəxəssis bildirib.

O, dərini qorumaq üçün günəş kremlərindən, baş geyimlərindən və nəmləndirici vasitələrdən istifadə etməyi tövsiyə edib.

"Ultrabənövşəyi şüaların ən güclü olduğu saatlarda – 11:00-16:00 aralığında birbaşa günəş altında qalmaqdan çəkinmək lazımdır", – deyə həkim əlavə edib.