Unudulmuş təcrübənin 40 il sonrakı nəticələri üzə çıxdı | Sincablar hər kəsi şoka saldı

Elmi təcrübələr həmişə alimlərin gözlədiyi nəticələri vermir. Məhz belə bir şey 40 il əvvəl ABŞ-də keçirilən və ilk baxışda əhəmiyyətsiz görünən bir tədqiqat zamanı baş verib. Lakin onun yekun nəticələri yalnız indi qiymətləndirilib.

1980-ci ildə ABŞ-nin Vaşinqton ştatında Müqəddəs Yelena vulkanı püskürmüşdü. Bərkimiş lava, kül və daşlar ətrafdakı bütün landşaftı qalın bir təbəqə ilə örtmüş, yerli meşələri və çəmənlikləri məhv etmişdi.

Aydın idi ki, landşaftın ilkin vəziyyətinə qayıtması üçün onilliklər, hətta əsrlər lazım olacaq.

O zaman amerikalı alimlər sincabların fəaliyyətinin məhv olmuş ekosistemin bərpasına təsiri barədə təcrübə keçirmək qərarına gəliblər. Fikir ondan ibarət olub ki, sincablar kül və bərkimiş lava təbəqəsində yuva qazarkən altındakı münbit torpağı və onunla birlikdə ekosistem üçün faydalı göbələk və bakteriyaları üzə çıxaracaq. Bu da belə yerlərdə bitki örtüyünün daha tez bərpasına kömək edəcəkdi.

Beləliklə, vulkan püskürməsindən iki il sonra bir qrup sincab bir gün həmin ərazidə saxlanılıb. Altı il sonra sincabların qazdıqları yerdə 40 mindən çox bitki boy atıb.

İlkin sınaqlardan 40 il sonra alimlər yenidən təcrübə sahəsini araşdırıb və orada inanılmaz bir irs aşkar ediblər. Bir zamanlar sincabların qazdığı yerlərdə vulkan ətrafında qalmış köhnə meşələrdən daha çox müxtəlif bakteriya və göbələk nümunələri tapılıb.