Vaşinqtonla Tehran arasında saziş bağlanacaq?

ABŞ Mərkəzi Komandanlığı İranın ABŞ Ordusuna məxsus “Apache” helikopterini vurmasına cavab olaraq İrana qarşı özünümüdafiə xarakterli zərbələr endirdiyini və prosesin artıq tamamlandığını elan edib.

Açıqlamada həmçinin bildirilir ki, əməliyyat İranın “əsassız təcavüzünə” qarşı proporsional cavab xarakteri daşıyıb.

Məlumata görə, zərbələr Hörmüz boğazında İran radarlarını, hava hücumundan müdafiə sistemlərini və yerüstü idarəetmə qurğularını hədəf alıb.

Həmçinin qeyd edilib ki, zərbələr ABŞ Hərbi Hava və Hərbi Dəniz Qüvvələrinin dəqiq idarə olunan sursatları və qırıcı təyyarələri ilə həyata keçirilib.

Bu arada ABŞ-nin vitse-prezidenti Cey Di Vens bildirib ki, ABŞ və İran arasında mümkün sazişin razılaşdırılması bir neçə ay və ya bir neçə həftəyə qədər vaxt apara bilər. Onun sözlərinə görə, sazişin müddəti danışıqların gedişatından asılıdır və geniş diapazonda dəyişə bilər.

"Düşünürəm ki, saziş bir həftə ərzində bağlana bilər, amma bir neçə ay ərzində də bağlana bilər. Vaşinqton ABŞ üçün iqtisadi cəhətdən faydalı olacaq və İranın nüvə proqramı ilə bağlı məsələləri həll edəcək bir razılaşma əldə etməyi gözləyir", – deyə o qeyd edib.

Vens həmçinin tərəflərin razılığa yaxın olduğunu, lakin onun bağlanması üçün əlavə işlərin görülməli olduğunu vurğulayıb.