Vaşinqtonu qarışdıran məhkəmə qərarı | Prezidentin hansı qərarı ləğv edildi? - Baku TV

ABŞ Ali Məhkəməsi iyunun 30-da doğum yerinə əsaslanan vətəndaşlıq hüququnun ləğv edilməsindən imtina edib və ABŞ Prezidenti Donald Trampın doğum yerinə görə ABŞ vətəndaşlığının verilməsinin faktiki olaraq dayandırılmasını nəzərdə tutan fərmanını Konstitusiyaya zidd hesab edib.

ABŞ Ali Məhkəməsinin rəsmi internet saytında iyunun 30-da dərc olunan qərara əsasən, məhkəmə ABŞ ərazisində doğulan qeyri-qanuni miqrantların və ölkədə müvəqqəti yaşayan şəxslərin uşaqlarının ABŞ vətəndaşlığı almaq hüququnu təsdiqləyib.

Ali Məhkəmənin sədri Con Roberts həm mühafizəkar, həm də liberal hakimlərin daxil olduğu çoxluğun adından qərarı yazıb. Donald Trampın fərmanının qüvvədən düşməsinin lehinə altı hakim səs verib. Üç hakim isə qərara etiraz edib.

"Vətəndaşlıq həm keçmişdə, həm də bu gün hüquqlara sahib olmaq, siyasi həyatımızda sərbəst iştirak etmək imkanı deməkdir. ABŞ Konstitusiyasına On dördüncü düzəlişin müəllifləri bu hüququ "bu ölkədə azad doğulan hər bir insana" şamil ediblər. Biz bu vədi bu gün də yerinə yetiririk", – deyə Con Roberts məhkəmə adından bildirib.

Donald Tramp isə Ali Məhkəmənin doğum hüququ əsasında vətəndaşlığın məhdudlaşdırılması ilə bağlı fərmanını etibarsız saymasını "Çinin qələbəsi" adlandırıb. O bu barədə "Truth Social" hesabında yazıb.

"Doğum hüququ əsasında vətəndaşlıq məsələsində əldə olunan möhtəşəm qələbə münasibətilə Çin Sədri Si Cinpini və böyük Çin xalqını təbrik etmək istəyirəm", – deyə Tramp yazıb.

Başqa bir paylaşımında isə Tramp Ali Məhkəmənin qərarından məyus olduğunu bildirib və Konqresi qanun layihəsi vasitəsilə bu normanı ləğv etməyə çağırıb.