"Xiaomi" öz zavodlarında robotların kütləvi tətbiqinə başlayacaq

Yaxın beş il ərzində fabrik və zavodlar əsas işi insanabənzər robotların yerinə yetirdiyi sistemlərə keçməyə başlayacaq.

Bunu Çinin “Xiaomi” şirkətinin baş direktoru Ley Tszyun deyib.

“Beijing Daily” qəzetinə verdiyi müsahibədə Ley özünün “Xiaomi” avtomobil zavodundan bir nümunə çəkib. Adətən avtomobilin böyük detalları insan əli ilə yoxlanılır, amma şirkət bunun əvəzinə süni intellekt modeli ilə işləyən qurğu quraşdırıb. İndi yoxlama prosesi insandan 10 dəfə tez, 5 dəfə dəqiq aparılır.

Leyin sözlərinə görə, bu, sənayenin hansı istiqamətə getdiyini göstərən real nümunədir. “Xiaomi”nin baş direktoru bunu “trilyon yuanlıq yeni bir sənayenin doğulması” adlandırıb. Amma belə bir bazarı təkbaşına formalaşdırmaq mümkün deyil, tərəfdaşlıqlar və bir çox şirkətin işləyə biləcəyi birgə mühəndislik platformaları lazımdır.

Ley vurğulayıb ki, “Xiaomi” beş il ərzində öz istehsal xətlərində insanabənzər robotlar tətbiq etməyə başlayacaq. Onlar hazırda insanlar tərəfindən yerinə yetirilən rutin və dəqiq tapşırıqları icra edəcək.

“Ev üçün nəzərdə tutulan robotlar isə zamanla daha da böyük bir sənayeyə çevriləcək. Belə modellər daha güclü aparat, daha ağıllı alqoritmlər tələb edəcək və zavod mühitinə bənzəməyən, adi, amma son dərəcə xaotik tapşırıqların öhdəsindən gəlməyi bacarmalı olacaq”, – o əlavə edib.

“Xiaomi” 2022-ci ildə ilk insanabənzər robot “CyberOne”ı təqdim etmişdi. O vaxtdan bəri şirkət süni intellekt, robototexnika və elektromobillər üçün ağıllı sistemlər üzrə mühəndisləri aktiv şəkildə işə götürür.

Ley izah edib ki, süni intellektin istehsalda tətbiqi tamamilə praktik mühəndislikdir: “Üstəlik, robotlar insanları ağır əl əməyindən azad edir, insanlar daha çox layihələndirmə, planlaşdırma, inkişaf kimi düşüncə tələb edən sahələrə keçir”.