Yaponiyada 2500-dən çox insan yanğına görə təxliyə olundu

Yaponiyanın şimal-şərqində baş verən meşə yanğını aprelin 24-də şəhər mərkəzinə doğru yayılmağa davam edib və 2500-dən çox insanın evakuasiya edilməsi ilə bağlı tapşırıq verilib.

Qeyd edək ki, Uzaq Şərq ölkəsində yanğın aprelin 22-də İvate prefekturasının dağlıq ərazisində başlayıb. Bundan iki saat sonra, təxminən 11 min əhalisi olan Otsuçi şəhəri yaxınlığında, 10 kilometr aralıda daha bir yanğın baş verib. Yanğınsöndürmə xidmətləri alovla həm qurudan, həm də havadan mübarizə aparsa da, yanğın hələ də nəzarət altına alınmayıb.

Dövlət televiziyasının məlumatına görə, aprelin 24-ü səhər saatlarına olan vəziyyətə əsasən, ümumilikdə 1100 hektardan çox ərazi yanıb. Hadisə nəticəsində ölən və ya xəsarət alanlar barədə məlumat yoxdur, lakin yaşayış evi də daxil olmaqla, ümumilikdə səkkiz bina dağılıb.

Qeyd edək ki, isti hava və külək yanğının söndürülməsinə mane olur. Meteoroloqların proqnozuna görə, qarşıdakı günlərdə bu cür hava şəraiti davam edəcək.