Yaşı 2 milyon ildən artıq olan ağac | Elmi kəşfin detalları hər kəsi təəccübləndirdi

ABŞ və Bruneydən olan beynəlxalq alimlər qrupu maraqlı bir elmi kəşfə imza atıb.

Belə ki, onlar 2 milyon ildən artıq yaşı olan, yerli dildə "Kapur Paya" adlanan "Dryobalanops rappa" ağacına aid daşlaşmış yarpaqlar aşkar ediblər.

Bu barədə məlumat "American Journal of Botany" elmi jurnalında dərc olunub.

Qeyd olunur ki, bu tapıntı müasir ağac növünün qədim Asiya tropik meşələrində mövcudluğunu birbaşa sübut edən ilk paleontoloji dəlildir.

Alimlər qədim yarpaqları mikroskop altında araşdıraraq yarpağın kutikulası üzərindəki xırda strukturları müasir "Dryobalanops rappa" növü ilə müqayisə ediblər. Nəticədə tam uyğunluq müəyyən olunub.

Hazırda bu ağac növü yalnız Borneo adasının torf meşələrində yayılıb və nəsli kəsilməkdə olan növlər siyahısındadır.

Qeyd edək ki, bu kəşfə qədər Asiyanın tropik meşələri haqqında paleontoloji məlumatlar Amazon və Afrika meşələri ilə müqayisədə olduqca az idi. İndi isə məlum olur ki, bəzi müasir ağac növləri hələ pliosen dövründə, yəni milyonlarla il əvvəl də bu ərazilərdə mövcud olub.