Yeni aşkarlanan planet öz orbiti üzrə dövrünü 14 saata tamamlayır

Astronomlar Yerdən 333 işıq ili məsafədə pulsasiya edən ulduzun ətrafında indiyə qədər gizli qalan planet aşkar ediblər.

Səma cismi klassik tranzit üsulu ilə deyil, əks olunan işığın yaratdığı kiçik dəyişikliklər sayəsində müəyyən edilib.

Bu barədə İtaliyanın "ANSA" nəşri Milli Astrofizika İnstitutunun rəhbərliyi ilə beynəlxalq komandanın apardığı tədqiqata istinadən məlumat yayıb.

Planet öz orbitini cəmi 14 saata tamamlayır. Onun kütləsi Yerinkindən 7,3 dəfə, radiusu isə 2,4 dəfə böyükdür. Planet "Neptun səhrası" adlanan bölgədə yerləşir. Bu ərazidə belə planetlərin mövcudluğu son dərəcə nadir hesab olunur.

Planetin orbiti əyilmiş vəziyyətdə olduğundan o, Yerlə öz ulduzu arasından keçmir. Alimlər planetin hərəkəti nəticəsində ulduz sisteminin parlaqlığında yaranan cüzi dəyişiklikləri təhlil ediblər. Bu üsul vasitəsilə onlar planetin əvvəlcə gündüz, daha sonra isə gecə tərəfini müşahidə edə biliblər.

Məlum olub ki, planetin sıxlığı əsasən isti sudan ibarət olan bir səma cisminə uyğun gəlir. Ulduzuna son dərəcə yaxın yerləşdiyindən planet güclü qabarma-çəkilmə qüvvələrinin təsirinə məruz qalır. Bu amil onun orbitinin sürətlə dəyişməsinə səbəb olur.