Yerdəki həyatın memarları aşkarlandı | Onlar qısa ömür sürüblər və...

“Üçüncü ulduz populyasiyası” Böyük Partlayışdan bir neçə yüz milyon il sonra əmələ gələn hipotetik kütləvi ulduzlardır.

Onların tərkibində heç bir metal olmayıb, son dərəcə parlaq olublar və qısa ömür sürüblər, həyatlarını güclü fövqəlnovalarda bitiriblər. Bu ulduzlar ağır elementləri sintez etməyə başlayan mənbələr olduqları üçün erkən kainatın memarları hesab olunur.

Leyden Rəsədxanasının astrofizikləri “Üçüncü ulduz populyasiyası”nın böyüməsinin məhdudlaşmasını onun radiasiyaya məruz qalması ilə izah edirlər. Bu məsələdə maqnit sahələrinin də təsiri mühüm rol oynayıb. Maqnit sahələri cazibə qüvvəsinin qarşısını alır, ulduzun yığılma diskinə düşə bilən qazın miqdarını azaldır.

Tədqiqat həmçinin müəyyən edib ki, maqnit sahələri qaz buludlarının parçalanmasına və çoxalmaya səbəb olub. Bu o deməkdir ki, kütləvi ulduzların təkamülü qonşu ulduzlarla qarşılıqlı təsirdən asılı olub, bu da onların ölçüsünü daha da məhdudlaşdırıb.