YPG-nin varlığı Türkiyəni narahat edir? | Suriyanın büdcəsi belə artacaq

Suriya keçid hökuməti ilə əsasını YPG kürd terror qrupları təşkil edən Suriya Demokratik Qüvvələri arasında razılaşma imzalanıb.

Razılaşmaya əsasən, YPG dövlət qurumlarında təmsil olunacaq. Sərhəd-keçid məntəqələri, hava limanları, neft və qaz sahələri və digər bütün təsisatlar dövlətin nəzarətinə verilir.

8 maddəlik razılaşmaya görə, YPG Əsəd rejiminin qalıntıları ilə mübarizədə keçid hökumətinə dəstək verəcək. Bu razılaşma hər iki tərəf üçün həm müsbət, həm mənfi nəticələrə səbəb olacaq.

Suriyadakı müvəqqəti hökumətin bundan qazancı zəngin neft-qaz yataqlarına nəzarət bərpa etmək, bu təbii sərvətləri diplomatik manevrlər üçün istifadə etməkdir. YPG-nin əlində olan neft-qaz yataqlarının hökumətin nəzarətinə keçməsi Suriya büdcəsinə xeyli vəsaitin daxil olmasına şərait yaradacaq.

Eyni zamanda YPG silahlılarının ordu və polisə qatılması ilə həm onların əlində olan silahlar dövlətin əlinə keçəcək, həm də ordu və hüquq-mühafizə orqanları əməkdaşlarının sayında əsaslı artım baş verəcək. Lakin bir şeyi də unutmayaq ki, bu şəxslər terrorçudur. Onların orduya, hüquq-mühafizə orqanlarına və dövlət orqanlarına girməsi ciddi təhlükədir.

Digər bir məsələ isə Türkiyənin məsələyə reaksiyasıdır. YPG Türkiyə tərəfindən terror təşkilatı kimi tanınır. Belə bir quruma Suriya hökumətində yer verilməsi Dəməşqin ən böyük müttəfiqi olan Ankaranı ciddi şəkildə narazı sala bilər. Suriya Prezidenti Əhməd əl-Şaraanın "Mazlum Kobani" kod adlı Fərhad Abdi Şahinlə bərabərhüquqlu şəxs kimi birbaşa müqavilə imzalaması yeni hökumətin legitimliyinə ciddi təhdiddir. YPG bu vəziyyətdən istifadə edərək siyasi fəaliyyətini davam etdirəcək, eyni zamanda parlamentdə təmsil olunaraq öz fikirlərini siyasi müstəvidə açıq ifadə edə biləcək.

Həmçinin kürdlərə mədəni muxtariyyətin verilməsi və bölgədə istismar ediləcək neft-qaz mədənlərindən yüksək payın ayrılması da nəzərdə tutulub. Bu da sözügedən bölgənin Suriyanın digər bölgələrinə nisbətən daha çox inkişaf edəcəyini deməyə əsas verir.

Suriya hökuməti YPG-nin əlindən silahını aldı. Lakin bu şəkildə əldə edilən razılaşma gələcəkdə daha ciddi problemlərin meydana çıxmasına səbəb ola bilər.