Zalujnıdan sonra onlar da vəzifədən gedir | Zelenskidən mühüm qərar

Ukraynada Silahlı Qüvvələrin Baş Komandanının dəyişməsinin ardınca bu ayın əvvəlindən siyasi hakimiyyətdə də kütləvi vəzifədən azadedilmələr başlayıb.

Ölkə prezidenti Volodimir Zelenski xüsusi nümayəndələri ilə yanaşı, Prezident Ofisinin əksər müşavirlərini istefaya göndərib.

Ölkənin beynəlxalq əlaqələr üzrə siyasi şərhçisi Maksim Yali bildirib ki, bununla da Zelenski müharibə boyu effektiv olmayan komandasını yeniləməyi planlaşdırır:

“Son bir neçə ay ərzində prezident aparatında, qismən də hökumətdə baş verən mühüm kadr dəyişiklikləri barədə Prezident Volodimir Zelenski ilin əvvəlində açıqlama vermişdi. Yəni bu yolla o, bir tərəfdən müəyyən mənada tarazlığı aradan qaldırmağa çalışır, prezidentlik müddətinin lap əvvəlindən yanında olan və effektivliyini nümayiş etdirməyən həmin şəxsləri işdən kənarlaşdırır.

Digər tərəfdən, bu, hərbi və maliyyə yardımının azalması fonunda həm hakimiyyəti möhkəmlətmək, həm də qəbul edilmiş qərarları və göstərişləri icra etmək üçün idarəetmə sisteminə yeni nəfəs gətirmək məqsədi daşıyır. Yəni sadə sözlə, bu, idarəçiliyin yenilənməsidir”.

Qeyd edək ki, istefaya göndərilənlərin əksəriyyəti Volodimir Zelenski hakimiyyətə gələndə onunla birgə vəzifə tutanlardır.