Zelenski ailəsinin azalan gəlirləri nəyin hesabına artdı?

Ukrayna Prezidenti Volodimir Zelenski 2023-cü il üçün əmlak, gəlir və xərclər haqqında bəyannamə dərc edib.

Bu barədə Ukrayna dövlət başçısının saytında məlumat verilib.

Bəyanata əsasən, Zelenski və ailəsinin gəliri 12 milyon 423 min 8 qrivna (təxminən 317 min ABŞ dolları) təşkil edib. Bu vəsaitin 7 milyon 455 min 972 qrivnası (190 min ABŞ dollarından çox) daxili dövlət borc istiqrazlarının satışından əldə edilib.

Zelenskilər ailəsinin 2023-cü ildəki gəliri əsasən əməkhaqqı, bank faizləri və daşınmaz əmlakın kirayə verilməsindən əldə edilən gəlirdən ibarət olub. Ümumilikdə bu məbləğ 4 milyon 967 min 036 qrivna (təxminən 127 min ABŞ dolları) təşkil edib.

Prezident aparatı ötən illə müqayisədə gəlirlərin artmasını kirayə haqqının bərpası ilə izah edib.

2021-ci ildə Zelenski ailəsinin ümumi gəlirini 10,824 milyon qrivna (demək olar ki, 276 min ABŞ dolları), 2022-ci ildə isə Ukrayna liderinin və ailəsinin gəliri təxminən üç dəfə azalaraq 3,692 milyon qrivna (94 min ABŞ dollarından çox) təşkil etmişdi.