Zelenski bir çox məmur və məşhurlarla bağlı təcili fərman imzaladı | Siyahıda elə adamlar var ki...

Ukrayna Prezidenti Volodimir Zelenski dövlətə xəyanətlə bağlı 34 nəfərin dövlət mükafatlarından məhrum edilməsi haqqında fərman imzalayıb.

Bu barədə Ukrayna Prezidenti Aparatının Mətbuat Xidməti məlumat yayıb.

Siyahıda keçmiş məmurlar, xalq deputatları, Ukrayna Təhlükəsizlik Xidmətinin və Baş Prokurorluğunun rəhbərləri, incəsənət xadimləri, eləcə də Rusiyanın siyasi, din və mədəniyyət xadimləri yer almaqla 34 nəfər daxil edilib. Onların hamısı Ukraynanın dövlət mükafatlarından həmişəlik məhrum olunublar.

On fiziki şəxsə qarşı təkcə mükafatlardan məhrumetmə deyil, həm də aktivlərin bloklanması, lisenziya və icazələrin ləğvi, habelə ticarət əməliyyatlarının tam dayandırılması ilə bağlı maksimum sanksiyalar tətbiq edilib. Onların arasında yeddi nəfər ilk dəfə sanksiyaya məruz qalıb.

Fərmana əsasən, musiqiçilər Nikolay Baskov, Filip Kirkorov, Aleksandr Malinin, və bəstəkar İqor Krutoy Ukraynanın Xalq artisti, Taisiya Povaliy və Ani Lorak isə Ukraynanın Əməkdar artisti fəxri adlarından məhrum ediliblər.