Zelenski bu planı dəyişdirməli oldu | Ukrayna ilə bağlı nələr istəyib?

Ukrayna Prezidenti Volodimir Zelenskinin ölkəsi üçün nəzərdə tutduğu 10 hissəli sülh planı 3-ə endirilib.

Sözügedən planın şərtlərinə gəldikdə isə qeyd olunub ki, ilkin olaraq nüvə obyektlərinin təhlükəsizliyi və nüvə silahından istifadənin yolverilməzliyi təmin edilməli, Zaporojye Atom Elektrik Stansiyası Ukraynanın nəzarətinə keçməli və Beynəlxalq Atom Enerjisi Agentliyinin prinsiplərinə uyğun fəaliyyət göstərməlidir. Daha sonra ərzaq təhlükəsizliyinə zəmanət verilməli və onun Qara və Azov dənizlərində naviqasiyasına imkan yaradılmalıdır.

Bundan əlavə, Ukrayna istehsalı olan kənd təsərrüfatı məhsullarının 3-cü dünya ölkələrinə çıxışı da təmin edilməlidir. Son olaraq isə bütün məhbusların, o cümlədən deportasiya edilən və qeyri-qanuni şəraitdə köçkün edilmiş azyaşlılar və mülki şəxslər azad edilməlidir.

Qeyd edək ki, rəsmi Kiyev bundan əvvəl təqdim etdiyi 10 maddəlik planda Rusiyanın regiondan çıxarılması kimi məsələlər hədəflənmişdi. Xarici KİV-in yaydığı məlumata görə, Prezident dünya dövlətlərinin liderlərinin İsveçrədə keçiriləcək sammitdə iştirakından imtina etməməsi üçün bəndlərin sayını azaldaraq 3-ə endirib.