Zelenski öz həmkarı Mindiçə qarşı sanksiyalar tətbiq etdi

Ukrayna Prezidenti Volodimir Zelenski “Energoatom”da korrupsiya işində ittiham olunan “Kvartal 95”in həmtəsisçisi Timur Mindiçə qarşı sanksiyalar tətbiq edib.

Ukrayna Prezidentinin imzaladığı sanksiyalar fərmanı iş adamı Aleksandr Zukermana da aiddir.

Hər iki sahibkarın adı ölkədə nüvə elektrik stansiyalarının istismarından məsul dövlət şirkəti olan “Energoatom”da irimiqyaslı maliyyə sui-istifadələri ilə bağlı istintaqda çəkilir.

3 illik sanksiyalara aktivlərin dondurulması, iqtisadi fəaliyyətə məhdudiyyətlər və digər tədbirlər daxildir. Adətən belə hallarda tətbiq olunan standart 10 illik müddətdən xeyli qısadır.

Timur Mindiç Prezidentlə əlaqələrindən əlavə, “Kvartal 95” studiyasının sahiblərindən biri kimi tanınır.

Müstəntiqlərin fikrincə, o, yüz milyonlarla dollar dəyərində satın almalarda rüşvətxorluqla bağlı korrupsiya sxeminin təşkilatçılarından biri hesab olunur.

Korrupsiyaya qarşı mübarizə orqanlarının məlumatına görə, Mindiç bu əməliyyatların əsas faydalananlarından biri olub. İstintaq başladıqdan qısa müddət sonra Mindiç və Zukerman Ukraynanı tərk ediblər.

Yüksək vəzifəli digər məmurlara qarşı da istintaq hərəkətləri edilib. Xüsusilə sonradan vəzifəsindən kənarlaşdırılan ədliyyə naziri German Qaluşenkonun evində axtarışlar aparılıb. Energetika naziri Svetlana Qrinçuk isə istefa verib.