Zelenski təhlükədədir: Ukrayna Prezidentinə qarşı sui-qəsd planları

"Moskvada bir neçə dəfə Ukrayna Prezidentinə sui-qəsd üçün planlar hazırlanıb”.

Bu sözləri Ukrayna hərbi kəşfiyyatının rəhbəri Kirill Budanov TSN telekanalına müsahibəsində deyib.

"Əməliyyat hazırlıqları diqqətlə planlaşdırılıb. Bir neçə dəfə ciddi sui-qəsd cəhdləri olub. Lakin Ukrayna xüsusi xidmət orqanlarının səyi nəticəsində bu cəhdlərin heç biri baş tutmayıb. Müharibənin Rusiya ərazisinə köçürülməsi əla ideyadır. Lakin bu müharibə yalnız Rusiya ərazisini yox, Moskvanın təsiri altında olan ölkələrin ərazilərini də əhatə etməlidir", - deyə o vurğulayıb.

"Əməliyyatlar nə qədər genişlənsə, bir o qədər yaxşıdır. Ukrayna qarşı tərəfin siyasi proseslərinə müdaxilə etməyə borcludur. Bizim vəzifəmiz qərarların qəbul edildiyi bölgələrdə hərbi kəşfiyyatın təsirini artırmaqdır. Çin Rusiyaya silah verməyə cəsarət etmir, yalnız ikili təyinatlı mal kimi PUA-lar və çiplər verir. Belarusa "Su-27M" təyyarələri üçün nüvə bombaları gətirilib. Lakin biz Krıma daxil olan zaman heç bir nüvə zərbəsi olmayacaq", - deyə Kirill Budanov əlavə edib.

Eyni zamanda kəşfiyyat rəhbəri zərərli vərdişlərinin olmadığını da bildirib. K.Budanovun sözlərinə görə, o hətta qəhvə də içmir. Həyat yoldaşı isə ona enerji içkiləri içməyi qadağan edib.