Zelenski Ukraynanın Aİ-yə üzvlük prosesindəki son vəziyyəti açıqladı - Baku TV

Qarşıdakı həftədə Ukraynanı Avropa İttifaqına üzvlük prosesində yeni irəliləyişlər gözləyir.

Bunu Ukrayna Prezidenti Volodimir Zelenski öz “Telegram” kanalında yayımladığı videoda bildirib.

Onun sözlərinə görə, yaxın günlərdə diplomatik görüşlərin sayı artacaq.

“Ukrayna Avropa İttifaqına üzvlük danışıqlarının başlanması üçün tələb olunan bütün şərtləri yerinə yetirib. Yay aylarında Ukraynanın Avropaya inteqrasiyası istiqamətində əlavə nəticələr əldə olunacağına ümid edirəm. Avropa İttifaqı ölkələri artıq Ukrayna və Moldovanın üzvlük danışıqlarının başlanması barədə razılığa gəliblər. Bir çox Avropa liderləri həm Ukraynanın Avropaya, həm də Avropanın Ukraynaya ehtiyacı olduğunu etiraf edir.

Rusiyanın Avropa yaxınlığında hərbi mövcudluğunu genişləndirməsi fonunda Ukraynanın hərbi təcrübəsi və imkanları Avropanın təhlükəsizliyi üçün mühüm əhəmiyyət daşıyır. Moskva uzunmüddətli anti-Avropa və antidemokratik siyasət yürüdərək təhlükə yaratmağa davam edir. Qarşıdakı günlərdə müharibənin təhlükəsizlik təminatları ilə başa çatdırılması məsələsi müzakirə olunacaq. Tərəfdaşlarla keçiriləcək sammitlərdə Rusiyaya qarşı əlavə sanksiyaların tətbiqi, eləcə də Ukraynaya Hava Hücumundan Müdafiə sistemləri ilə bağlı yeni dəstəyin verilməsi vacibdir”, – deyə Prezident bildirib.