Zelenskidən bütün dünyaya mesaj | Küçələrə çıxıb xalqa müraciət etdi

Ukrayna Prezidenti Volodimir Zelenski İkinci Dünya müharibəsində qələbə münasibətilə xalqa müraciət edib.

Rusiya ilə müharibəyə xüsusi diqqət çəkən Ukrayna lideri vurğulayıb ki, Rusiya döyüş meydanında, diplomatik arenada, iqtisadi məkanda mübarizə aparılmalı olan bir ölkədir, müharibə hələ də davam edir, insanlar həlak olur.

“80 il öncə hər kəs yaşamaq uğrunda mübarizə aparırdı. İnsanlar pisliyin məğlubiyyətini, yaxşılığın qələbəsini istəyirdilər. Təəssüflər olsun ki, 3 il öncə Ukrayna üzərində yenidən hava hücumu haqqında həyəcan siqnalı səsləndi və şər qüvvələr 2022-ci il fevralın 24-də Ukrayna torpaqlarına girdilər. Müharibənin bir daha baş verməməsi üçün dünya Rusiyanın dərsini verməlidir”, ‒ V.Zelenski bildirib.

Qeyd edək ki, Rusiya Prezidenti Vladimir Putinin mayın 9-na kimi elan olunmuş üç günlük atəşkəsinə baxmayaraq, mayın 7-dən 8-nə keçən gecə Ukraynanın bəzi şəhərlərinə zərbələr endirilib. Ukrayna mətbuatında yayılan məlumata görə, Donetsk, Çerkassı və Sumı atəşə tutulub.