Zelenskini yuxuda gördü, 3 dəfə cərimələndi

Rusiyanın Çita şəhərində Mərkəzi Dairə Məhkəməsi yerli sakin İvan Losevi Rusiya Ordusunu “nüfuzdan salma” maddəsi ilə təqsirli bilərək onu 120 min rubl, yəni təqribən 2 500 manat məbləğində cərimələyib. Bu barədə məhkəmənin mətbuat xidməti xəbər verib.

Qeyd edək ki, İ.Losev bundan əvvəl eyni maddə ilə üç dəfə cərimələnib: ilk dəfə sosial şəbəkədəki paylaşımında Ukrayna Prezidenti Volodimir Zelenski haqqında yuxusunu danışdığı üçün, iki dəfə isə “Dojd” və “BBC News”a verdiyi müsahibədə ilk cərimədən danışdığı üçün. İ.Losevə qarşı sonuncu cinayət işinin açılmasına səbəb isə onun “Instagram” hesabında Rusiya Silahlı Qüvvələrinin nümayəndələrinin fəaliyyətini gözdən salan paylaşımı olub.

Məhkəmənin mətbuat xidməti bildirib ki, İ.Losev günahını tam etiraf edib və əməlindən peşman olub, ona görə də onun işinə xüsusi qaydada baxılıb. Bundan əlavə, məhkəmə İ.Losevin “cinayət aləti” olan “iPhone” mobil telefonunun dövlət xeyrinə müsadirə edilməsi barədə qərar çıxarıb.