Ağır cəza ilə nəticələnən hadisəyə səbəb nə olub? - Baku TV

Bakıda 15 yaşlı bacısının 30 yaşlı nişanlısını bıçaqlamaqda təqsirli bilinən Araz Səmədovun cinayət işinin məhkəməsi yekunlaşıb.

Bakı Ağır Cinayətlər Məhkəməsinin hakimi Fəxri Məmmədovun sədrliyi ilə keçirilən yekun iclasda məhkəmə istintaqının yekunlaşdığı elan edilib.

Daha sonra prokuror dövlət ittihamının müdafiəsi zamanı Araz Səmədovun 11 il 3 ay azadlıqdan məhrum edilməsini məhkəməyə təklif edib. Müşavirədən sonra hökm elan edilərək Araz Səmədov 11 il 3 ay azadlıqdan məhrum edilib.

Qeyd edək ki, hadisə 2025-ci ilin sentyabrında Bakının Əmircan qəsəbəsində baş verib. Babək Uğurlunun çoxsaylı bıçaq xəsarətləri ilə xəstəxanaya yerləşdirilməsi ilə bağlı Suraxanı Rayon Polis İdarəsinə məlumat daxil olub. Əməliyyat zamanı hadisəni törətməkdə təqsirli bilinən Araz Səmədov saxlanılaraq istintaqa cəlb edilib.

Araşdırmalarla məlum olub ki, Babək Uğurlu Araz Səmədovun 15 yaşlı bacısının nişanlısı olub. Hadisə baş verən gün isə gecə saat 2 radələrində Araz Səmədov Babək Uğurlunu bacısı ilə birlikdə otaqda görüb. Bu zaman o, hər ikisinə bıçaq xəsarətləri yetirib.

Onun barəsində Cinayət Məcəlləsinin bir neçə maddəsi ilə ittiham irəli sürülərək həbs qətimkan tədbiri seçilib.