Ağır cinayətdə təqsirləndirilən iş adamının məhkəməsində yekun qərar verildi - Baku TV

Bakıda sevgilisini öldürməkdə ittiham olunan iş adamı Emil Ağacanovun barəsindəki cinayət işi üzrə məhkəmə prosesi başa çatıb.

Bakı Ağır Cinayətlər Məhkəməsinin hakimi Səbinə Məmmədzadənin sədrliyi ilə baş tutan sonuncu iclasda məhkəmə istintaqının yekunlaşdığı elan edilib.

Prokuror təqsirləndirilən şəxsin cinayəti törədərkən həqiqətən anlaqsız vəziyyətdə olduğunu diqqətə çatdırıb. Buna görə də Emilin müalicəsinin psixiatriya xəstəxanasında davam etdirilməsini məqsədəuyğun hesab edib. Qarşı tərəfin müdafiəçiləri isə bununla razılaşmayaraq, məhkəmədən cinayət işinin yenidən ibtidai istintaqa qaytarılmasını istəyiblər.

Müşavirədən sonra məhkəmənin qərarı elan olunub. Bildirilib ki, Emil Ağacanovun cinayəti anlaqsız vəziyyətdə törətdiyi sübuta yetirilib. Bunları nəzərə alaraq məhkəmə onu cinayət məsuliyyətindən azad edərək, barəsində tətbiq edilən məcburi müalicəyə dair qərarı qüvvədə saxlayıb.

Qeyd edək ki, hadisə 2025-ci il avqustun 23-də Bakının Yasamal rayonunda qeydə alınıb. Paytaxt sakini İradə Muradovanın meyiti Emil Ağacanova məxsus mənzilin hamamında aşkar olunub. İlkin araşdırmalarla qadının Emil Ağacanov tərəfindən xüsusi amansızlıqla qətlə yetirildiyi məlum olub. Ona qarşı Cinayət Məcəlləsinin 120.2.4-cü (xüsusi amansızlıqla adam öldürmə) maddəsi ilə cinayət işi açılıb.