Aktyor və arvadının qətli ilə bağlı qandonduran detallar | Qatil hər şeyi etiraf etdi

Bakıda aktyor İosif Tkaç Zusyeviç və arvadı Lyudmila Tkaç Mixaylovnanı qəsdən öldürməkdə təqsirləndirilən İslam Hadıyevin cinayət işi üzrə məhkəmənin baxış iclası keçirilib.

Bakı Ağır Cinayətlər Məhkəməsində hakim Azər Tağıyevin sədrliyi ilə baş tutan prosesdə ittiham aktı elan edilib.

Qeyd olunub ki, təqsirləndirilən İslam Hadıyevin mərhum aktyorla şəxsi tanışlığı olub. Onlar bazarda tanış olub və bundan sonra İosif Zusyeviçin dəvəti ilə evlərində təmir işləri aparıb. İslam Hadıyev təmir işləri apararkən evin saxlanc yerində torbada külli miqdarda pulun olduğunu görüb. Mənzildə işini bitirdikdən sonra pulu götürərək oranı tərk edib.

Bir müddət sonra ev sahibi ona zəng edib və götürdüyü 50 min manatı tələb edib. Lakin təqsirləndirilən şəxs puldan xəbəri olmadığını bildirib.

Təqsirləndirilən məhkəmədə sərbəst ifadəsi zamanı hadisəni törətdiyini etiraf edib. Onun sözlərinə görə, bir neçə gün sonra İosifin yoldaşı ilə bazarda rastlaşıb və qadın onu təhqir edərək pulu qaytarmağını istəyib.

Təmir zamanı işlətdiyi alətlərdən biri Tkaç ailəsində qaldığı üçün onu götürməyə həmin mənzilə gedib. Bu zaman İosif onun üstünə hücum edib. Həmin an İslam Hadıyev üzərindəki bıçağı çıxararaq onu qorxutmaq istəyib. Onları ayırmaq istəyən Lyudmila İslamın əlindən tutan zaman əvvəlcə bıçaq kişinin, daha sonra isə qadının boğazına batıb.

Təqsirləndirilən ona elan olunmuş ittihama görə özünü qismən təqsirli bildiyini deyib. Daha sonra dövlət ittihamçısı İslam Hadıyevin ibtidai istintaqa verdiyi ifadəsi ilə məhkəmədə verdiyi ifadə arasında ziddiyətlər olduğunu bildirib. İş üzrə növbəti məhkəmə prosesi aprelin 3-nə təyin olunub.