“Almanı ona görə tüpürüb sildi ki..." - Bazarda ürəkbulandıran əməli ört-basdır edirlər? - Baku TV

Salyan bazarında lentə alınan görüntülər sosial şəbəkələrdə müzakirələrə səbəb olub.

Kadrlarda satıcı qadının almanı ağız suyu ilə təmizlədiyi iddia olunur.

Görüntülərdə yer alan satıcı Xatirə Həşimova məsələ ilə bağlı açıqlama verərək bildirib ki, sözügedən almalar satış üçün deyil, şəxsi istifadəsi üçün alınıb.

“Göyərti satıram. Nəvələrim üçün iki kiloqram alma almışdım. Sildim və evimə aparmaq üçün yığdım. Satış üçün deyildi, öz evim üçün almışdım”, – deyə o qeyd edib.

Digər satıcılar da həmkarlarını müdafiə ediblər. Onların sözlərinə görə, Xatirə Həşimova uzun illərdir bazarda çalışan zəhmətkeş insanlardan biridir.

“Bu xanım illərdir burada alver edir. Dünəndən hamımız bu hadisəyə görə şokdayıq. Almanı uşaqları üçün götürmüşdü, evinə aparmaq üçün sildi. Kim paylaşıbsa, bunu qərəzli şəkildə edib”, – deyə satıcılardan biri bildirib.

Bazarın rəhbərliyi də yayılan görüntülərlə bağlı iddiaların həqiqəti əks etdirmədiyini vurğulayıb.

“Bu qadın uzun illərdir burada göyərti satır. Övladları üçün meyvə alıb aparırdı və sadəcə, onları silib zənbilinə yığırdı. Kimsə bunu çəkib paylaşıb. Bu, böhtandır. Ola bilsin ki, həmin şəxsin qadına qarşı şəxsi qərəzi olub”, – deyə bazar rəhbəri qeyd edib.