Araz Musayevi kimlər bıçaqlayıb? - Saxlanılanlar barədə təcili məlumat

Muay-Tay Federasiyasının prezidenti Araz Musayevin Antalyada bıçaqlı hücuma məruz qalmasının detalları məlum olub.

Türkiyə mediasının məlumatına görə, hücumda 4 nəfər iştirak edib. Artıq hadisə ilə bağlı 2 şübhəli Antalya Hava Limanında saxlanılıb.

Hücümda iştirak etdiyi bildirilən daha 2 şübhəli də müəyyən edilib. Onlardan birinin Rusiyaya qaçdığı və bu şəxsin tutulması üçün İnterpol xətti ilə beynəlxalq axtarışa verildiyi bildirilib. Digər şübhəlinin isə hələ də axtarışlarının davam etdiyi qeyd olunub.

Digər tərəfdən, şübhəlilərin Türkiyəyə giriş tarixləri və avtomobil icarəsi fəaliyyəti araşdırılıb. Onların birlikdə hərəkət etdiklərinə dair sübutlar və ölkədən qaçmaq cəhdləri qiymətləndirildikdə bu 4 şübhəlinin yalnız bu hücumu həyata keçirmək məqsədilə Türkiyəyə gəldikləri və əvvəlcədən planlaşdırılmış bu hərəkəti qəsdən adam öldürmə niyyəti ilə törətdikləri qənaətinə gəlinib.

Qeyd edilib ki, istintaq davam etdirilərkən Araz Musayevin əvvəlcə boyun, daha sonra isə qarın nahiyəsindən bıçaqlandığı müəyyən olunub.