Arvadını gölün qırağında amansızlıqla öldürən kişi | “Qonşu evimizə gələndən sonra...”

Bakının Qaradağ rayonu ərazisində həyat yoldaşını qətlə yetirməkdə təqsirləndirilən Rəşad Tağıyevin cinayət işi üzrə məhkəmə baxışı keçirilib.

Bakı Ağır Cinayətlər Məhkəməsində hakim Elnur Nuriyevin sədrliyi ilə baş tutan prosesdə prokuror ittiham aktını elan edib.

Daha sonra sübutların ardıcıllığı üzrə təqsirləndirilən şəxsin ifadəsi dinlənilib. Rəşad Tağıyev ifadəsində hadisəni qısqanclıq zəmnində törətdiyini bildirib və özünü qismən təqsirli saydığını qeyd edib.

Rəşad Tağıyev ifadəsində onu da bildirib ki, hər şey qonşuluqda yaşayan qadının onların evinə gələrək Rəşadın həyat yoldaşı Sevincin onunla getməsini istəməsindən sonra olub. O isə buna icazə verməyib. Bir qədər sonra həmin qadının qızı onların evinə gələrək anasının hara getdiyindən Sevincin məlumatlı olduğunu Rəşada deyib.

Rəşad Tağıyev yoldaşının bu hərəkətindən hiddətlənərək evdən bıçaq götürərək həyat yoldaşı Sevinc Hüseynovanı yaxınlıqdakı gölün kənarına aparıb. Orada qadına bıçaqla zərbə vurduqdan sonra onu əlləri ilə boğaraq öldürüb. Daha sonra gödəkçəsini meyitin üzərinə örtərək hadisə yerindən uzaqlaşıb.

Qeyd edək ki, hadisə iyunun 30-da gecə saatlarında Qaradağ rayonu, Lökbatan qəsəbəsində, “Massiv 1” adlanan ərazidə baş verib. Məlumata görə, Rəşad Tofiq oğlu Tağıyev aralarında yaranan mübahisə zamanı 36 yaşlı həyat yoldaşı Sevinc İnşallah qızı Hüseynovaya müxtəlif dərəcəli bədən xəsarətləri yetirərək onu qəsdən öldürüb. Sevinc Hüseynovanın meyiti qəsəbə ərazisindəki gölün kənarında aşkar olunub.

Rəşad Tağıyev barəsində Cinayət Məcəlləsinin 120.1-ci (qəsdən adam öldümə) maddəsi ilə ittiham irəli sürülüb.