Atamın başına ağacla vurdular | Qohumlar kütləvi davaya girdi

Yaxın qohumların münaqişəsi və kütləvi davası 3 nəfərin xəstəxanaya yerləşdirilməsi ilə nəticələnib.

Belə ki, qoyunçuluqla məşğul olan Sabirabadın Sərxanbəyli kənd sakinləri Ələsgər Heybətov və onun iki oğlunun əmioğluları – Şirvan və Şəhliyar tərəfindən hücuma məruz qaldığı bildirilir.

Xəsarət alan şəxslərdən biri – Elşən Heybətov hadisənin təfərrüatlarını Baku TV-yə danışıb.

“Qardaşım zəng etdi ki, tez gəl, qoyunlarımın qarşısını kəsiblər. Gedən kimi maşından ağac, kürək götürüb üstümüzə töküldülər. Atamı vurdular, qardaşımı suya atdılar. Atamı çətinliklə maşına qoydum. Qolum, qarnım pis vəziyyətdədir”, – o qeyd edib.

Hadisə ilə bağlı Daxili İşlər Nazirliyində araşdırmalara başlanılıb.

Qeyd edək ki, hücuma məruz qalan şəxslər Salyan Rayon Mərkəzi Xəstəxanasına yerləşdirilib. Xəstəxanadan verilən məlumata görə, döyülən şəxslərin müalicəsi nəzarət altındadır və onların tezliklə evə buraxılması təmin ediləcək.