Atası zəng edib, açan olmayıb... | İmişlidəki dəhşətli hadisə barədə qohumlar danışdı

İmişlidə bir ailənin 3 üzvü yaşadıqları mənzildə dəm qazından boğularaq ölüb, biri ağır vəziyyətdə xəstəxanaya yerləşdirilib.

Hadisə martın 8-i axşam saatlarında rayonun Bəhrəmtəpə qəsəbəsində Vasif Azadova məxsus fərdi yaşayış evində qeydə alınıb.

Yaxınlarının bildirdiyinə görə, vəfat edən ana Mehriban Azadovanın atası onlara zəng etsə də, telefonlara cavab verən olmadığı üçün o, qızının yaşadığı evə gəlib və orada qızı Mehriban Azadova, kürəkəni Vasif Azadov və onların iki azyaşlı övladları Məhəmməd Azadov və Fatimə Azadovanın qazdan zəhərləndiyinin şahidi olub.

36 yaşlı ailə başçısı Vasif Azadovun müalicəsi Rayon Mərkəzi Xəstəxanasının Reanimasiya şöbəsində davam etdirilir, vəziyyəti ağırdır.

Qeyd edək ki, ailəsini itirən Vasif Azadov 44 günlük Vətən müharibəsi qazisidir. Faktla bağlı hüquq-mühafizə orqanları araşdırma aparır.