Atasına deyib ki, sərinləmək istəyirəm, gedirəm... | Kürdə boğulan oğlanın babası fəryad etdi

19 yaşlı Sabirabad sakini Kür çayında boğulub. Hadisə iyulun 4-ü rayonun Ulacalı kəndi ərazisində qeydə alınıb.

“Mən hadisədən gecə xəbər tutmuşam. Kürün qırağına gedəndə gördüm ki, hamı oradadır. Atasına çimməyə getmək istədiyini söyləyib. O isə icazə verməyərək “özüm səni aparacağam” deyib. Üzməyi bacarmırdı. 2-ci kurs tələbəsi idi”, − mərhumun babası söyləyib.

Qeyd edək ki, Fövqəladə Hallar Nazirliyinin “112” qaynar xəttinə Kür çayının Sabirabad rayonu Ulacalı kəndindən keçən hissəsində bir nəfərin batması barədə məlumat daxil olub.

Məlumatla əlaqədar Nazirliyin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri axtarışlara cəlb olunublar. Axtarışlar nəticəsində meyit iyulun 5-i səhər saatlarında sudan çıxarılaraq aidiyyəti üzrə təhvil verilib.

Faktla bağlı araşdırma aparılır.